एचपी प्रेजेन्ट्स नाडा अटो शो २०२६ का लागि स्टल बाँडफाँड सम्पन्न, गोलाप्रथाबाट टुंगियो स्टल आवंटन

नाडा अटोमोबाइल्स एसोसिएसन अफ नेपाल (नाडा) ले आगामी २०८३ भदौ ९ देखि १४ गतेसम्म आयोजना गर्ने ‘एचपी प्रेजेन्ट्स नाडा अटो शो २०२६’ का लागि प्रदर्शनी स्टलहरूको गोलाप्रथामार्फत बाँडफाँड सम्पन्न गरेको छ।

शुक्रबार नाडा सचिवालयमा आयोजित कार्यक्रममा नाडाका अध्यक्ष, निवर्तमान अध्यक्ष, पदाधिकारी, केन्द्रीय कार्यसमिति सदस्य तथा अटो शोमा सहभागी कम्पनीका प्रतिनिधिहरूको उपस्थितिमा स्टल आवंटन प्रक्रिया सम्पन्न गरिएको हो।

नाडाका अनुसार अटो शोमा सहभागी कम्पनीहरूका लागि यसअघि नै स्टल दर्ता खुला गरिएको थियो। सोही दर्ताका आधारमा पारदर्शी र निष्पक्ष रूपमा गोलाप्रथा सञ्चालन गरी सबै सहभागी कम्पनीलाई स्टल उपलब्ध गराइएको जनाएको छ।

यस वर्षको अटो शोका लागि गोलाप्रथामार्फत १९ वटा प्यासेन्जर भेहिकल, १० वटा दुईपाङ्ग्रे सवारी, १७ वटा लाइट कमर्सियल भेहिकल तथा ७६ वटा साना स्टलमध्ये ४५ वटा अटो कम्पोनेन्ट्स कम्पनीहरूलाई स्टल आवंटन गरिएको नाडाले जनाएको छ।

स्टल आवंटन सम्पन्न भएसँगै सहभागी कम्पनीहरूले आफ्नो प्रदर्शनी तयारीलाई तीव्र बनाउने अपेक्षा गरिएको छ। यस वर्षको नाडा अटो शोमा विद्युतीय सवारीसाधन, पेट्रोल तथा डिजेल सवारी, मोटरसाइकल, अटो पार्ट्स, लुब्रिकेन्ट, टायर, ब्याट्री, वित्तीय सेवा तथा अटोमोबाइलसँग सम्बन्धित विभिन्न उत्पादन तथा सेवाहरू प्रदर्शन हुनेछन्।

कार्यक्रमको समापनमा नाडाका महासचिव मिलनबाबु मल्लले सहभागी सबै कम्पनीप्रति आभार व्यक्त गर्दै सफल अटो शो आयोजना गर्न सबै पक्षको सहकार्य आवश्यक रहेको बताए।